உடலை மட்டும் வாட்டும் நோய்கள் சில. உள்ளத்தை மட்டும் வாட்டும் நோய்கள் சில. உடல், உள்ளம் இந்த இரண்டையும் வாட்டுகின்ற நோய்களோ பலப்பல... இந்த இரண்டிலுமே நோயின்றி இருக்குமேயானால் அது தான் உண்மையான உடல் ஆரோக்கியம். ஆனால் நோயற்ற வாழ்வு கொண்டோர் இப்புவியில் உண்டா என்றால்... இல்லை என்ற பதில்தான் கிடைக்கும்.
ஆனால், ஆண்டவனின் படைப்பில் எத்தனையோ புல், பூண்டுகளும், செடி, கொடி, பச்சிலைகளும் மனித வர்க்கத்திற்கு நோய் தீர்க்கும் சஞ்சீவிகளாக விளங்கி வருகின்றன. அவைகள் அன்றும் - இன்றும் - என்றும் இயற்கை தரும் சத்துணவாகவும், இன்மருந்தாகவும் நமக்கு பயன்பட்டு வருகின்றன.
நலிவு தரும் நோய் நீக்கும் நல்பொருட்களில் முதலிடம் பெறுவதில் பூண்டும் ஒன்று என்றால் அது மிகையல்ல. இதில் புரோட்டீன், விட்டமின் பி, விட்டமின் சி, பொஸ்பரஸ் ஆகிய சத்துக்கள் நிறைந்து உள்ளன.
உடலில் உள்ள கொழுப்புச் சத்தை, கணிசமாக குறைக்க வல்லது வெள்ளைப்பூண்டு. தொடர்ந்து 3 மாதங்கள் வெள்ளைப்பூண்டு சாப்பிட்டுவர, நமது உடலில் கொலஸ்ட்ராலின் அளவு கட்டுக்குள் வரும்.
வெள்ளைப் பூண்டை உணவில் சேர்த்துக் கொள்வதனால் உணவின் மணம், சுவை அதிகரிப்பதுடன் உடலில் ஏற்படும் வாயுக் கோளாறினை நீக்கி, உடல் சூட்டினைத் தணிக்கின்றது. மேலும் தாய்மார்களுக்கு பிரசவத்திற்கு பின் தொடர்ந்து, பூண்டை பாலுடன் வேக வைத்துக் கொடுப்பதால் போதிய அளவு பால் சுரக்க உதவுகின்றது.
இதுதவிர பூண்டு உடலில் கிருமிநாசினியாகவும் பயன்படுகிறது. பூண்டைப் பாலுடன் வேக வைத்தோ, அதை உரித்து வாயில் மென்று விழுங்கினாலோ பத்தே நாட்களில் அது கிருமிநாசினியாகச் செயல்படுகிறது. குடலில் உள்ள அமியாபீஸில் என்ற உடலுக்கு தீங்கு செய்யும் நுண்ணிய கிருமியை முழுமையாக ஒழித்து விடுகின்றது. இந்தக் கிருமிகளை ஆங்கில மருந்துகளால் கூட முழுமையாக ஒழிக்க முடியாது. பற்களையும் ஈறுகளையும் பாதுகாக்க உதவுகிறது.
இருமல், கக்குவான், ரத்த அழுத்தம், வாயுத் தொல்லை ஆகியவற்றுக்கும் பூண்டு கைகண்ட மருந்தாகும்.
பூண்டு சாற்றில் நவரசத்தைக் குழைத்து வெண்குஷ்டத்தின் மேல் தடவி வர, நிறம் மாறி இயற்கை நிறம்பெறும். பூண்டின் பற்களைப் பாலில் அரைத்து பருக்களின் மீது பூசி வர பருக்கள் உடைந்து விடும். 10 கிராம் பூண்டின் பற்களை 30 மில்லி நல்லெண்ணையுடன் சேர்த்து காய்ச்சவும், பூண்டு மிதந்தவுடன் வடிகட்டி, ஆறியவுடன் காதில் 2 அல்லது 3 துளிகள் விட காது வலி குணமாகும்.
பூண்டின் சாற்றினை உள்நாக்கில் பூசிவர அதன் வளர்ச்சி குறைந்து அதனால் ஏற்படும் இருமல், அரிப்பு, வீக்கம் குறையும்.
பூண்டு லேகியம் புத்துணர்வு தரும் லேகியங்களில் ஒன்றாகும். உரித்த மலைப் பூண்டு 400 கிராம் எடுத்து, அதைச் சுத்தமாக்கி ஒரு லிட்டர் பசும்பாலில் போட்டு வேகவைத்து அதில் 400 கிராம் பனை வெல்லம் சேர்த்து இத்துடன் 300 கிராம் பசும் வெண்ணையை சேர்த்து காய்ச்சி பதமாக்கிய பிறகு, லேகிய பதம் வந்தவுடன் எடுத்து பத்திரப்படுத்தி வைத்துக் கொள்ள வேண்டும்.
தினமும் காலை, மாலை இரண்டு வேளையும் 5 கிராம் சாப்பிட்டு வரவேண்டும். தொடர்ந்து 48 நாட்கள் சாப்பிட்டு வந்தால் வயிற்று பொருமல், காச நோய், எலும்பு தொடர்பான வியாதிகள், இருமல், கோழைக்கட்டு, கபம் கட்டுதல் போன்ற நோய்கள் பறந்து போய்விடும்.
தைலம், மாத்திரை ஆகியவைகளிலும் பூண்டு சேர்க்கப்படுகிறது.
தற்பொழுது பூண்டு தேநீர் பேதியை நிறுத்தும் மருந்து எனவும் கண்டுபிடிக்கப்பட்டு உள்ளது.
இரு பூண்டுகளை எடுத்து அதை தனித்தனியாக உதிர்த்துக் கொள்ள வேண்டும். அவற்றை தோசைக்கல்லில் போட்டு சுட வேண்டும். சுட்ட பூண்டுகளை தண்ணீரில் போட்டு 5 முதல் 7 நிமிடம் வரை கொதிக்க வையுங்கள். பிறகு இந்தத் தண்ணீரில் வழக்கம் போல் தேநீர் போட்டு குடிக்கலாம்.
ஒவ்வொரு மூன்று மணி நேரத்திற்கு ஒரு முறை இந்த தேநீரை ஆறவைத்து குடித்தால் பேதி நின்றுவிடும்.
பூண்டு - 1/2 கிலோ
பால் - 50 மி.லி
கருப்பட்டி - 1/2 கிலோ
நல்லெண்ணெய் - 100 மி.லி
பூண்டை உரித்து பால் விட்டு வேக வைத்துக் கொள்ளவும்
பூண்டு சீக்கிரம் வெந்து விடும் மிக அதிகமாக வேக தேவையில்லை 1/2 கிலோ பூண்டு 3 நிமிடங்களில் வெந்து விடும்.
வெந்த பூண்டை மிக்ஸியில் நன்கு அரைத்துக் கொள்ளவும்
கருப்பட்டியை 1/2 கப் தண்ணிர் விட்டு கரைத்து கல் நீக்கி விடவும்
கருப்பட்டி முழுவதும் கரையவில்லையெனில் அடுப்பில் வைத்து கரைத்துக் கொள்ளவும்
அந்த தண்ணீரில் பூண்டு பேஸ்டை போட்டு அடுப்பில் வைத்து கிளறவும்
கிளற பின் அல்வா பதத்திற்கு வரும் . லேகியத்தை தொட்டால் கையில் ஒட்டக்கூடாது.
பின்பு நல்லெண்ணெயை கொஞ்சம் கொஞ்சமாக விட்டு கிளறி இறக்கவும் பார்ப்பதற்கு அல்வா போன்றுதான் இருக்கும்.
சாதாரணமாக உள்ளவர்கள் ஒரு நாளைக்கு ஒரு வேளை மட்டும் ஒரு தேக்கரண்டி சாப்பிடவும்
குழைந்தைகளுக்கு பால் கொடுப்பவர்கள் 2 வேளை சாப்பிடலாம்.
