ஏழையின் நிலம் எனக்கா?

லால்பகதூர் சாஸ்திரி அலஹாபாத் நகரசபை உறுப்பினராக இருந்த காலம்... நகரசபையின் சார்பில், ஏழை மக்கள் குடி இருப்பதற்காகக் குறைந்த விலையில் மனைகள் விற்கப்பட்டன.

சாஸ்திரி அப்போது ஊரில் இல்லை. அவரின் நண்பர் ஒருவர், 'சாஸ்திரியும் சொந்த வீடு கட்டிக் கொள்ளட்டுமே!' என்கிற எண்ணத்தில் அவருக்காக ஒரு மனையை வாங்கினார். ஊரிலிருந்து திரும்பிய சாஸ்திரி, நடந்ததை அறிந்து வருந்தினார். ''ஏழைகளுக்கு நிலம் என்று அறிவித்து விட்டு, அதை நாம் வாங்கிக் கொள்வது தவறில்லையா?'' என்று நண்பரிடம் கேட்டார்.

''உண்மைதான். அப்படிப் பார்த்தால் நீங்களும் பணக்காரர் இல்லையே?'' என்றார் நண்பர்.

''இருக்கலாம்! ஆனால், எனக்குச் சொந்தமாக எந்த சொத்தும் வாங்க மாட்டேன் என்று காந்திஜியிடம் ஒருமுறை வாக்குக் கொடுத் திருக்கிறேன். அதை மீறுவது தர்மம் அல்ல. அரசியல்வாதிகள் சொத்து வாங்கத் துவங்கினால், அது லஞ்சத்தில்தான் போய் முடியும். எனவே, நிலத்தைத் திருப்பிக் கொடுத்து விடுங்கள்'' என்றார் சாஸ்திரி. அதன்படி நிலம், நகரசபை நிர்வாகத்திடம் ஒப்படைக்கப்பட்டது.

_ அரூர். மு. மதிவாணன்

    Vikatan emagazine